ഇന്ത്യയ്ക്ക് 110 റണ്‍സിന്റെ വന്‍ തോല്‍വി

ബ്രിസ്‌ബേന്‍: ത്രിരാഷ്ട്ര ക്രിക്കറ്റ് ടൂര്‍ണമെന്റില്‍ ഓസ്‌ട്രേലിയയ്‌ക്കെതിരായ മത്സരത്തില്‍ ഇന്ത്യയ്ക്ക് 110 റണ്‍സിന്റെ വന്‍ തോല്‍വി. 289 റണ്‍സിന്റെ വിജയലക്ഷ്യവുമായി ബാറ്റിങ്ങിനിറങ്ങിയ ഇന്ത്യ 43.3 ഓവറില്‍ 178 റണ്‍സിന് എല്ലാവരും പുറത്തായി. 56 റണ്‍സെടുത്ത ക്യാപ്റ്റന്‍ മഹേന്ദ്രസിങ് ധോനി മാത്രമാണ് ഓസ്‌ട്രേലിയന്‍ പേസ് ബൗളിങ്ങിനെ അല്പമെങ്കിലും ചെറുത്തുനിന്നത്. ഓസ്‌ട്രേലിയയ്ക്കുവേണ്ടി ബെന്‍ ഹില്‍ഫനോസ് അഞ്ച് വിക്കറ്റ് വീഴ്ത്തി. ബ്രെറ്റ് ലീ മൂന്ന് വിക്കറ്റ് നേടി. ഓസ്‌ട്രേലിയ ബോണസ് പോയിന്റ് നേടിക്കൊണ്ടാണ് കളി ജയിച്ചത്.

നേരത്തെ ടോസ് നേടി ആദ്യം ബാറ്റ് ചെയ്ത ഓസ്‌ട്രേലിയ 50 ഓവറില്‍ അഞ്ച് വിക്കറ്റ് നഷ്ടത്തില്‍ 288 റണ്‍സെടുത്തു. മൈക്ക് ഹസി 59ഉം പീറ്റര്‍ ഫോറസ്റ്റ് 52ഉം റണ്‍സെടുത്തു. ഡേവിഡ് വാര്‍ണര്‍(43), മാത്യു വെയ്ഡ്(45), ഡാന്‍ ക്രിസ്റ്റിയന്‍(30), ഡേവിഡ് ഹസി(26) എന്നിവരും നന്നായി ബാറ്റ് ചെയ്തു.

ഇന്ത്യയ്ക്കുവേണ്ടി ഇര്‍ഫാന്‍ പഠാന്‍ മൂന്നും സഹീര്‍ ഖാന്‍, രോഹിത് ശര്‍മ എന്നിവര്‍ ഓരോ വിക്കറ്റ് വീതവും വീഴ്ത്തി.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.