കര്‍ണാടക ഏ ജി ബി.വി. ആചാര്യ രാജിവച്ചു

ബംഗളൂരു: കര്‍ണാടക അഡ്വക്കെറ്റ് ജനറല്‍ ബി.വി. ആചാര്യ രാജിവച്ചു. തമിഴ്നാട് മുഖ്യമന്ത്രി ജെ. ജയലളിതയ്ക്കെതിരെയുള്ള അനധികൃത സ്വത്ത് സമ്പാദക്കേസില്‍ സ്പെഷ്യല്‍ പബ്ലിക്ക് പ്രോസിക്യൂട്ടറായി വാദിച്ചിരുന്നത് ആചാര്യയായിരുന്നു. സ്പെഷ്യല്‍ പബ്ലിക്ക് പ്രോസിക്യൂട്ടര്‍ സ്ഥാനം രാജിവയ്ക്കണമെന്നു സര്‍ക്കാര്‍ വൃത്തങ്ങളില്‍ നിന്നു കടുത്ത സമ്മര്‍ദം ഉണ്ടായിരുന്നതായി ആചാര്യ വെളിപ്പെടുത്തി. എന്നാല്‍ അഡ്വക്കെറ്റ് ജനറല്‍ സ്ഥാനം രാജിവയ്ക്കുകയാണെന്ന് അദ്ദേഹം വ്യക്തമാക്കി. ഒരു സമയം രണ്ടു പദവികള്‍ വഹിക്കാന്‍ പാടില്ലെന്നു ചൂണ്ടിക്കാട്ടിയായിരുന്നു സര്‍ക്കാര്‍ സമ്മര്‍ദ്ദം. പക്ഷേ ജയലളിത കേസില്‍ നിന്നു തന്നെ ഒഴിവാക്കുകയായിരുന്നു ലക്ഷ്യമെന്ന് ആചാര്യ. ബിജെപി കേന്ദ്രനേതൃത്വത്തിന്‍റെ ഇടപെടലാണ് ഇതിനു പിന്നില്‍. ബിജെപി-എഐഎഡിഎംകെ സഖ്യമില്ലെങ്കിലും ഇവര്‍ക്കു പരസ്പരം എതിര്‍പ്പില്ലെന്നും അദ്ദേഹം കൂട്ടിച്ചേര്‍ത്തു.

മുഖ്യമന്ത്രിയുടെ നിര്‍ദേശ പ്രകാരം ഗവര്‍ണറാണ് ഏജിയെ നിയമിക്കുന്നതെന്ന് ആചാര്യ പറഞ്ഞു. ജയലളിത കേസില്‍ തന്നെ സ്പെഷ്യല്‍ പബ്ലിക്ക് പ്രോസിക്യൂട്ടറായി നിയമിച്ചതു കര്‍ണാടക ഹൈക്കോടതിയാണ്. ഈ സാഹചര്യത്തില്‍ പദവി ഒഴിയാന്‍ താന്‍ തയറല്ലെന്നും അദ്ദേഹം വ്യക്തമാക്കി. രണ്ടു പദവികളും ഒരു പോലെ കൊണ്ടുപോകുന്നതില്‍ തെറ്റില്ല. 2011 ല്‍ തന്നെ ഏജിയായി നിയമിക്കുമ്പോള്‍ താന്‍ സ്പെഷ്യല്‍ പബ്ലിക്ക് പ്രോസിക്യൂട്ടര്‍ ആണെന്ന കാര്യം സര്‍ക്കാരിന് അറിയാമായിരുന്നുവെന്നും അദ്ദേഹം പറഞ്ഞു. 2004 മുതല്‍ അദ്ദേഹം എസ് പിപിയാണ്.

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.