2ജി സ്പെക്ട്രം :സ്വകാര്യ ടെലികോം കമ്പനികളുടെ ലൈസന്‍സുകള്‍ റദ്ദാക്കി

ന്യൂഡല്‍ഹി: 2ജി സ്പെക്ട്രം ഇടപാടില്‍ ഉള്‍പ്പെട്ട സ്വകാര്യ ടെലികോം കമ്പനികളുടെ ലൈസന്‍സുകള്‍ സുപ്രീംകോടതി റദ്ദാക്കി. 11 കമ്പനികളുടെ 122 ലൈസന്‍സുകളാണു റദ്ദാക്കിയത്. സ്പെക്ട്രം ലൈസന്‍സ് വിതരണത്തിനു വീണ്ടും ലേലം നടത്തണമെന്നും കോടതി. നാലു മാസത്തിനകം ലേലം പൂര്‍ത്തീകരിക്കണം. ജസ്റ്റിസ് എ.കെ. ഗാംഗുലി, ജി.എസ്. സിങ് വി എന്നിവരടങ്ങിയ ബെഞ്ചിന്‍റേതാണ് ഉത്തരവ്.

2009 ജനുവരി 28നു ശേഷം അനുവദിച്ച ലൈസന്‍സുകളാണു റദ്ദാക്കിയത്. മുന്‍ മന്ത്രി എ. രാജയാണു ചട്ടം മറികടന്ന് ലൈസന്‍സ് നല്‍കിയത്. 85 കമ്പനികള്‍ക്കു നിശ്ചിത യോഗ്യത ഉണ്ടായിരുന്നില്ല. ഇടപാടിലൂടെ ചില കമ്പനികള്‍ അനധികൃത നേട്ടമുണ്ടാക്കി. ടാറ്റ, ഐഡിയ, യൂണിനോര്‍, വിഡിയൊകോണ്‍, ലൂപ്, എസ് ടെല്‍, സ്വാന്‍ തുടങ്ങിയ കമ്പനികളുടെ ലൈസന്‍സുകളാണു റദ്ദാക്കിയത്.

കേന്ദ്ര ആഭ്യന്തര മന്ത്രി പി. ചിദംബരത്തിനെതിരേ സിബിഐ അന്വേഷണം വേണമെന്ന ആവശ്യത്തില്‍ വിചാരണക്കോടതിക്കു തീരുമാനമെടുക്കാമെന്നും ഉത്തരവില്‍ പറയുന്നു. രണ്ടാഴ്ചയ്ക്കകം ഇക്കാര്യത്തില്‍ തീരുമാനമെടുക്കണമെന്നു വിചാരണക്കോടതിക്കു നിര്‍ദേശം നല്‍കി. ഇടപാടു സമയത്തു ധനമന്ത്രിയായിരുന്ന ചിദംബരം ടെലികോം മുന്‍ മന്ത്രി എ. രാജയ്ക്കു ചട്ടം മറികടക്കാന്‍ അനുമതി നല്‍കിയെന്ന ആരോപണം സിബിഐ അന്വേഷിക്കണമെന്ന ആവശ്യത്തിലാണു നിര്‍ദേശം. ജനതാ പാര്‍ട്ടി നേതാവ് സുബ്രഹ്മണ്യം സ്വാമിയാണ് ഇതു സംബന്ധിച്ച ഹര്‍ജി സമര്‍പ്പിച്ചത്.

ശനിയാഴ്ച പ്രത്യേക സിബിഐ കോടതി ജഡ്ജി ഒ.പി. സെയ്നി കേസ് പരിഗണിക്കും. സിബിഐയുടെ അന്വേഷണ റിപ്പോര്‍ട്ട് സിവിസിയ്ക്കു സമര്‍പ്പിക്കും.

അതേസമയം കേസില്‍ അന്വേഷണത്തിനു പ്രത്യേക സംഘത്തെ നിയോഗിക്കണമെന്ന ഹര്‍ജി കോടതി തള്ളി. സിബിഐ കേന്ദ്ര സര്‍ക്കാരിനു കീഴിലായതിനാല്‍ അന്വേഷണം സ്വാധീനിക്കപ്പെടാനിടയുണ്ടെന്നു ചൂണ്ടിക്കാട്ടിയാണു ഹര്‍ജി. സുപ്രീംകോടതി അഭിഭാഷകനും ഹസാരെ സംഘാംഗവുമായ പ്രശാന്ത് ഭൂഷണ്‍ ആണു ഹര്‍ജി സമര്‍പ്പിച്ചത്.

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.