മഅദനിക്ക് തുടര്‍ചികിത്സ നല്‍കുന്നതില്‍ വീഴ്ച

ബംഗളൂരു: ബംഗളൂരു സ്ഫോടനകേസില്‍ പ്രതിചേര്‍ക്കപ്പെട്ട് പരപ്പന അഗ്രഹാര ജയിലില്‍ കഴിയുന്ന പി.ഡി.പി ചെയര്‍മാന്‍ അബ്ദുന്നാസിര്‍ മഅ്ദനിക്ക് തുടര്‍ചികിത്സ നല്‍കുന്നതില്‍ ജയില്‍വകുപ്പ് അധികൃതരുടെ ഭാഗത്തുനിന്ന് വീഴ്ച. മഅ്ദനിക്ക് ജാമ്യം നിഷേധിച്ച സുപ്രീംകോടതി ആവശ്യമായ തുടര്‍ചികിത്സ കര്‍ണാടക സര്‍ക്കാര്‍ ഉറപ്പുവരുത്തണമെന്ന് വിധിച്ചിരുന്നെങ്കിലും ഇത് ലഭിക്കുന്നില്ല എന്നതാണ് അവസ്ഥ. കഴിഞ്ഞ ഒമ്പതിന് ബംഗളൂരു ജയനഗറിലെ കോട്ടക്കല്‍ ആര്യവൈദ്യശാലയുടെ ശാഖയില്‍ പരിശോധന നടത്തുകയാണ് ഇതുവരെ ചെയ്തിട്ടുള്ളത്. ഇവിടത്തെ ശാഖയില്‍ കിടത്തി ചികിത്സക്ക് സൗകര്യമില്ലാത്തതിനാല്‍ ഡോക്ടര്‍ സുര്‍ജിത്ത് വാര്യര്‍ ആര്യവൈദ്യശാലയുടെ കോട്ടക്കലിലുള്ള ചീഫ് ഫിസിഷ്യന്‍ ഡോ. പി.കെ. വാര്യര്‍ക്ക് കേസ്ഷീറ്റ് കൈമാറുകയായിരുന്നു. ഇതനുസരിച്ച് ചികിത്സ നിര്‍ദേശിച്ച് പി.കെ. വാര്യര്‍ ജയില്‍ അധികൃതര്‍ക്ക് ഫാക്സ് അയച്ചെങ്കിലും തുടര്‍നടപടി വൈകി. കഴിഞ്ഞ 12ന് ഫാക്സ് സന്ദേശം ജയില്‍ അധികൃതര്‍ക്ക് ലഭിച്ചെങ്കിലും തിങ്കളാഴ്ച മഅ്ദനിയെ സന്ദര്‍ശിച്ച ഭാര്യ സൂഫിയ മഅ്ദനിയാണ് ജയനഗറിലെ ശാഖയില്‍നിന്ന് മരുന്നുകള്‍ എത്തിച്ചത്. ഇതുവരെയുള്ള മരുന്നുകള്‍ എല്ലാംതന്നെ നാട്ടില്‍നിന്ന് ബന്ധുക്കള്‍ മുഖേനയാണ് ജയിലില്‍ എത്തിച്ചതെന്നും സൂഫിയ പറഞ്ഞു.

മുമ്പ് ചികിത്സിച്ചിരുന്ന ബംഗളൂരുവിലെ `സൗഖ്യ` ആശുപത്രിയിലെ ഡോക്ടര്‍മാര്‍, മഅ്ദനിക്ക് തുടര്‍ചികിത്സ നല്‍കുന്നതില്‍ വിട്ടുവീഴ്ചയരുതെന്ന് കാണിച്ച് മൂന്ന് തവണയിലധികം ജയില്‍ അധികൃതര്‍ക്ക് കത്തയച്ചിരുന്നു. ആശുപത്രി ചെലവ് ലഭിക്കാത്തതിനാല്‍ ഇക്കാര്യമടക്കം ചൂണ്ടിക്കാട്ടി നല്‍കിയ കത്തിന് പക്ഷേ, അധികൃതര്‍ ഇതുവരെയും മറുപടി നല്‍കിയിട്ടില്ല. ഈകാരണം കൊണ്ടുതന്നെ ചികിത്സ വൈകിയതിനാല്‍ തോളെല്ലില്‍നിന്ന് വേദന കൈകളിലേക്ക് എത്തിയിരിക്കുകയാണ്. മാത്രമല്ല, പ്രമേഹം അധികരിച്ചതിനാല്‍ ഡയബറ്റിക് റെറ്റിനോപതി മൂലം വലതുകണ്ണിന്‍െറ കാഴ്ച സാരമായി കുറഞ്ഞിട്ടുണ്ട്. കാലിന്‍െറ നീരും മറ്റ് അസുഖങ്ങളും കൂടിയതിനാല്‍ ശാരീരികമായി ഏറെ അവശതയിലാണ് മഅ്ദനിയെന്നും സൂഫിയ പറഞ്ഞു. കേസിലെ മറ്റു പ്രതികളെ പ്രശ്നക്കാരെന്ന പേരില്‍ ബെല്‍ഗാമിലെ ജയിലിലേക്ക് മാറ്റിയതുപോലെ മഅ്ദനിയെയും മാറ്റാനുള്ള നീക്കത്തിന്‍െറ ഭാഗമായാണ് പ്രമുഖ ഇംഗ്ളീഷ് പത്രത്തില്‍ മഅ്ദനി കുഴപ്പക്കാരനാണെന്ന രീതിയില്‍ വാര്‍ത്ത വന്നതെന്നും അവര്‍ കൂട്ടിച്ചേര്‍ത്തു. അതേസമയം, കര്‍ണാടക സര്‍ക്കാറില്‍നിന്ന് നിര്‍ദേശം ലഭിക്കാത്തതിനാലാണ് ജയില്‍വകുപ്പ് അധികൃതര്‍ക്ക് തുടര്‍നടപടി എടുക്കാന്‍ സാധിക്കാത്തതെന്നറിയുന്നു.

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.