ഐ എസ് ആര്‍ ഒ ചെയര്‍മാനെതിരെ മാധവന്‍ നായര്‍

ന്യൂഡല്‍ഹി: സര്‍ക്കാര്‍ മേഖലയില്‍ പ്രവര്‍ത്തിക്കുന്നതിനുള്ള വിലക്കിനുപിന്നില്‍ പ്രവര്‍ത്തിച്ചത് ഐ.എസ്.ആര്‍.ഒ ചെയര്‍മാന്‍ കെ. രാധാകൃഷ്ണനാണെന്ന് ജി മാധവന്‍ നായര്‍ ആരോപിച്ചു. തനിക്കെതിരെയുള്ള ആരോപണങ്ങളില്‍ സര്‍ക്കാരിനെ തെറ്റിദ്ധരിപ്പിച്ചത് ഐഎസ്ആര്‍ഒ ചെയര്‍മാന്‍ ഡോ. കെ. രാധാകൃഷ്ണനാണ്. ചട്ടങ്ങള്‍ പാലിക്കാതെയാണു നടപടി. ഭീരുത്വം നിറഞ്ഞ രീതിയാണിത്. പ്രാഥമിക അന്വേഷണം പോലും നടത്താതെ രഹസ്യക്കത്തു മുഖേന ഉത്തരവു കൈമാറുന്നതു രാജ്യത്തിന്‍റെ ചരിത്രത്തിലാദ്യമാണ്. രാധാകൃഷ്ണനും പ്രധാനമന്ത്രിയും ഇതിന് ഉത്തരം പറയണം. അഭിമാനത്തിന്‍റെ പ്രശ്നമായതിനാല്‍ കോടതിയെ സമീപിക്കുന്ന കാര്യം ആലോചിക്കും. ഇതു സംബന്ധിച്ച പൂര്‍ണ വിവരങ്ങള്‍ തനിക്കു ലഭിച്ചിട്ടില്ല. ഇതു ലഭിച്ച ശേഷം തീരുമാനമെടുക്കും.

ആന്‍ഡ്രിക്സ് ഒരു കമ്പനിയാണ്. കമ്പനിയെടുക്കുന്ന നൂറുകണക്കിനു ദൈനം ദിന തീരുമാനങ്ങള്‍ സര്‍ക്കാരിനെ അറിയിക്കേണ്ട ചുമതലയില്ല. പൊതുമേഖല കമ്പനികളില്‍ പലതും ഇത്തരം തീരുമാനങ്ങളെടുക്കാറുണ്ട്. അതെല്ലാം നിയമപ്രകാരമായതിനാലാണു സര്‍ക്കാരിനെ അറിയിക്കാത്തത്.

ഇപ്പോഴത്തെ നീക്കങ്ങള്‍ക്കു പിന്നില്‍ രാധാകൃഷ്ണനും അദ്ദേഹത്തിന്‍റെ അഡിഷനല്‍ സെക്രട്ടറിയും അടക്കമുള്ളവരാണ്. ദേവാസ് മള്‍ട്ടി മീഡിയയുമായുള്ള കരാര്‍ റദ്ദാക്കുകയാണു ലക്ഷ്യം. സുതാര്യമായ കരാര്‍ റദ്ദാക്കി തങ്ങള്‍ക്കു നേട്ടമുണ്ടാക്കുകയാണു ലക്ഷ്യം. ദേവാസിനെപ്പറ്റി ഐഎസ്ആര്‍ഒ സര്‍ക്കാരിനു നല്‍കിയ വിവരങ്ങള്‍ പലതും അര്‍ധ സത്യമാണെന്നും അദ്ദേഹം പറഞ്ഞു.

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.