മനുഷ്യക്കടത്ത് : മുഖ്യപ്രതി അറസ്റ്റില്‍

ചെന്നൈ: കൊച്ചി വഴി ശ്രീലങ്കന്‍ പൗരന്‍മാരെ ഓസ്‌ട്രേലിയയിലേക്ക് കടത്താന്‍ ശ്രമിച്ച കേസിലെ മുഖ്യപ്രതി ചെന്നൈയില്‍ പിടിയിലായി. മുന്‍ എല്‍.ടി.ടി.ഇ പ്രവര്‍ത്തകനായ സന്ദൂരനാണ് അറസ്റ്റിലായത്. കൊച്ചിയില്‍ നിന്നുള്ള പോലീസ് സംഘം ചെന്നൈയിലെ ചെങ്കല്‍പേട്ട് കോളനിയില്‍ നിന്നാണ് ഇയാളെ പിടിച്ചത്.

കഴിഞ്ഞ വര്‍ഷം സപ്തംബര്‍ എട്ടിനാണ് കൊച്ചിയില്‍ ഒളിച്ചുതാമസിക്കുകയായിരുന്ന 15 ശ്രീലങ്കന്‍ സ്വദേശികളെ പോലീസ് പിടികൂടിയത്. ശിവന്‍ പിള്ളൈ (33), നാഗരഞ്ജന്‍ (32), മുരുകാനന്ദന്‍ (31), ഗണേശലിംഗം (47), ജനാര്‍ദ (27), ഈലവേനന്താം (22), കാന്തന്‍ (19), ലോഗേശ്വരന്‍ (28), ഗജേന്ദ്രന്‍ (30), ധനുശങ്കര്‍ (19), കരുണാകരന്‍ (42), നിഷാന്ത് (21), വിജിന (30), അരുള്‍സീലി (42), ബാലസുബ്രഹ്മണ്യം (34) എന്നിവരാണ് അന്ന് പിടിയിലായത്. ഓസ്‌ട്രേലിയയ്ക്ക് പോകാന്‍ അമ്പതിനായിരം രൂപ വീതം സന്ദൂരന്‍ എന്ന ശ്രീലങ്കന്‍ സ്വദേശി ഏജന്റിന് നല്‍കിയിട്ടുണ്ടെന്ന് ഇവര്‍ മൊഴി നല്‍കി. അന്നുമുതല്‍ പോലീസ് സന്ദൂരന് വേണ്ടിയുള്ള തിരച്ചിലിലായിരുന്നു.

അറസ്റ്റിലായവര്‍ ശ്രീലങ്കയില്‍ നിന്ന് വിമാനമാര്‍ഗം കൊച്ചിയില്‍ വന്നവരാണ്. പാസ്‌പോര്‍ട്ട് ഉണ്ടായിരുന്നുവെങ്കിലും കാലാവധി കഴിഞ്ഞ വിസയായിരുന്നു. ശ്രീലങ്കയിലെ യുദ്ധശേഷം ഹൊസൂര്‍, സേലം എന്നിവിടങ്ങളില്‍ അഭയാര്‍ഥികളായി എത്തിയവരാണ് ഇവര്‍. അഭയാര്‍ഥി കാര്‍ഡുണ്ടെങ്കിലും പലര്‍ക്കും പാസ്‌പോര്‍ട്ടോ മറ്റ് യാത്രാ രേഖകളോ ഇല്ല. കൊച്ചി വഴി ബോട്ട്മാര്‍ഗം തൊഴില്‍ തേടി ഓസ്‌ട്രേലിയയിലേക്ക് പോകുകയാണ് തങ്ങളുടെ ലക്ഷ്യമെന്ന് പിടിയിലായവര്‍ പോലീസിനോട് പറഞ്ഞു. മീന്‍പിടിത്തം അറിയാവുന്നവരാണ് ഭൂരിപക്ഷവും.

സന്ദൂരന്‍ ഏര്‍പ്പാടാക്കിയ `സീ ക്വീന്‍` എന്ന ബോട്ട് വൈപ്പിനില്‍ നിന്ന് പോലീസ് അന്ന് പിടിച്ചെടുത്തിരുന്നു. 58 അടി നീളവും 8000 ലിറ്റര്‍ ഡീസല്‍ കപ്പാസിറ്റിയുമുള്ള ഈ ബോട്ടില്‍ 50 പേര്‍ക്ക് കഴിയാം. കൊച്ചിയില്‍ നിന്ന് ഇവര്‍ ബോട്ടുമാര്‍ഗം ഓസ്‌ട്രേലിയക്ക് പോകാന്‍ തീരുമാനിച്ചത് പോലീസിന് സംശയത്തിനിട നല്‍കി. ഓസ്‌ട്രേലിയയിലേക്കുള്ള ഇവരുടെ യാത്ര എല്‍ടിടിഇ പോലുള്ള ഏതെങ്കിലും തീവ്രവാദ സംഘടന രൂപവത്കരിക്കാനാണോ എന്നും പോലീസ് സംശയിച്ചു. ചെന്നൈയില്‍ നിന്ന് മുമ്പ് 85 അംഗ സംഘം ഓസ്‌ട്രേലിയയിലേക്ക് പോയതായി പിടിയിലായവര്‍ മൊഴി നല്‍കിയിരുന്നു. ഇതു സംബന്ധിച്ച് ഇന്റലിജന്‍സ് വിഭാഗത്തിന്റെ സഹായത്തോടെ അന്വേഷണം തുടരുകയാണ്.

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.