സല്‍മാന്‍ റുഷ്ദിക്ക് നല്‍കിയ ഇന്ത്യന്‍ വിസ റദ്ദാക്കണമെന്ന് ദാറുല്‍ ഉലൂം

ന്യൂദല്‍ഹി: ജനുവരി 20 മുതല്‍ 24 വരെ ജയ്പൂരില്‍ നടക്കുന്ന സാഹിത്യോല്‍സവത്തില്‍ പങ്കെടുക്കുന്നതിന് വിവാദ നോവലിസ്റ്റ് സല്‍മാന്‍ റുഷ്ദിക്ക് നല്‍കിയ വിസ റദ്ദാക്കണമെന്ന് ദാറുല്‍ ഉലൂം ദിയൂബന്ദ് വൈസ് ചാന്‍സലര്‍ മൗലാനാ അബ്ദുല്‍ ഖാസിം നുഅ്മാനി ആവശ്യപ്പെട്ടു. മുസ്ലിംകളുടെ മതവികാരം വൃണപ്പെടുത്തിയ റുഷ്ദിക്ക് അനുവദിച്ച ഇന്ത്യന്‍ വിസ റദ്ദാക്കണമെന്ന് നുഅ്മാനി പ്രസ്താവനയില്‍ ആവശ്യപ്പെട്ടു. റുഷ്ദിയോടുള്ള മുസ്ലിംകളുടെ വികാരം സര്‍ക്കാര്‍ മാനിക്കണമെന്നും അദ്ദേഹം അഭ്യര്‍ഥിച്ചു.

അതേസമയം, ഇന്ത്യ സന്ദര്‍ശിക്കുന്നതിന് തനിക്ക് വിസ ആവശ്യമില്ളെന്ന് റുഷ്ദി വ്യക്തമാക്കി. `ദി സെയ്റ്റനിക് വേഴ്സസ്` എന്ന നോവല്‍ എഴുതിയതിനെ പേരില്‍ 1989ല്‍ റുഷ്ദിയെ വധിക്കണമെന്ന ഇറാന്‍ ആത്മീയ നേതാവ് പുറപ്പെടുവിച്ച ഫത്വ 1998ല്‍ മയപ്പെടുത്തിയെങ്കിലും ഇതുവരെ പിന്‍വലിച്ചിട്ടില്ല. അതേസമയം സാഹിത്യോല്‍സവത്തില്‍ മുന്‍നിശ്യിച്ച പ്രകാരം റുഷ്ദി പങ്കെടുക്കുമെന്ന് സംഘാടകര്‍ അറിയിച്ചു. നമ്മുടേതുപോലള്ള ബഹുസ്വര സമൂഹത്തില്‍ സാഹിത്യത്തിലെ അഭിപ്രായ സ്വാതന്ത്ര്യം അനുവദിക്കേണ്ടതാണെന്ന് സാഹിത്യേല്‍സവം സംഘടിപ്പിക്കുന്ന ടീം വര്‍ക്ക്സ് പ്രൊഡക്ഷന്‍സിന്‍െറ മാനേജിംഗ് ഡയറക്ടര്‍ സഞ്ജയ് റോയ് അറിയിച്ചു. ജയ്പൂര്‍ സാഹിത്യോല്‍സവം ജനാധിപത്യ പാരമ്പര്യത്തിന്‍െറയും അഭിപ്രായ സ്വാതന്ത്ര്യത്തിന്‍െറയും വേദിയാണെന്നും അദ്ദേഹം പറഞ്ഞു. റീത്ത കോത്താരി, തരുണ്‍ തേജ്പാല്‍, ഇറ പാണ്ടെ എന്നിവരാണ് സാഹിത്യോല്‍സവത്തില്‍ പങ്കെടുക്കുന്ന മറ്റു പ്രമുഖര്‍. റുഷ്ദിയുടെ വിസ റദ്ദാക്കുന്നില്ളെങ്കില്‍ വിദേശകാര്യമന്ത്രാലയം, പ്രധാനമന്ത്രി, കോണ്‍ഗ്രസ് അധ്യക്ഷ എന്നിവരെ സമീപിച്ച് തങ്ങളുടെ ആവശ്യം ഉന്നയിക്കുന്നുമെന്നും നുഅ്മാനി വ്യക്തമാക്കി.

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.