ഹസാരെയുടെ സമരത്തിന് എയ്ഡ്‌സ് ഭീഷണിയില്ല

മുംബൈ: ശക്തമായ ലോക്പാല്‍ബില്‍ പാസാക്കണമെന്നാവശ്യപ്പെട്ട് ഉപവാസസമരത്തിനൊരുങ്ങുന്ന അണ്ണാ ഹസാരെക്കും സംഘത്തിനും എയ്ഡ്‌സ് ഭീഷണിയില്ലെന്ന് രാജ്യത്തെ എയ്ഡ്‌സ് സൊസൈറ്റി അറിയിച്ചു. ഹസാരെയെയും അനുയായികളെയും എയ്ഡസ് രോഗാണു വഹിക്കുന്ന സിറിഞ്ചു കൊണ്ട് കുത്തിവെക്കുമെന്ന ഭീഷണി സൊസൈറ്റി തള്ളിക്കളഞ്ഞു. ഇത്തരം പേടിപ്പെടുത്തല്‍ അടിസ്ഥാനരഹിതമാണെന്നും ബന്ധപ്പെട്ടവര്‍ ചൂണ്ടികാട്ടി.

എയ്ഡ്‌സ് രോഗാണുവിന് മനുഷ്യ ശരീരത്തിന്റെ പുറത്ത് അധികം നിലനില്‍പ്പില്ലെന്നും സിറിഞ്ചിലെ രക്തം ഉണങ്ങേണ്ട താമസം രോഗാണുവും നശിക്കുമെന്നും ഈ സാഹചര്യത്തില്‍ ഇത്തരം സൂചികള്‍ യാതൊരുവിധ ഭീഷണിയും ഉയര്‍ത്തുന്നില്ലെന്നും എയ്ഡ്‌സ് സൊസൈറ്റി ഓഫ് ഇന്ത്യ ജനറല്‍ സെക്രട്ടറി ഡോ. ഈശ്വര്‍ എസ്. ഗിലാഡ വ്യക്തമാക്കി.

ശക്തമായ ലോക്പാല്‍ ബില്ലിനുവേണ്ടി ഇനിയും വാശിപിടിച്ചാല്‍ ഹസാരെയേയും അനുയായികളെയും എയ്ഡ്‌സ് രോഗാണുക്കളുള്ള സൂചികൊണ്ട് കുത്തിവയ്ക്കുമെന്ന് കാണിച്ച് ദല്‍ഹി പൊലീസിന് കഴിഞ്ഞ ദിവസം ഭീഷണിക്കത്ത് ലഭിച്ചിരുന്നു. ഇതിനുവേണ്ടി 500 ഓളം സിറിഞ്ചുകള്‍ തയ്യാറാക്കിയിട്ടുണ്ടെന്നും ചുരുങ്ങിയത് ആയിരം പേരെയെങ്കിലും ഇതുപയോഗിച്ച് കുത്തിവയ്ക്കുമെന്നും കത്തില്‍ ഭീഷണി മുഴക്കിയിരുന്നു.

എന്നാല്‍ ഇത്തരം ഭീഷണികള്‍ ആളുകള്‍ക്കിടയില്‍ ഭീതി പരത്താനും ഹസാരെയുടെ സമരവുമായി ജനങ്ങള്‍ സഹകരിക്കാതിരിക്കാനുമാണെന്നും ഗിലാഡ പറഞ്ഞു.

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.