കുട്ടികളിലെ അമിത വികൃതി

ചെറിയ പ്രായത്തില്‍ തന്നെ അമിതമായ വികൃതി കാണിക്കുന്ന കുട്ടികള്‍ മാതാപിതാക്കള്‍ക്ക് പലപ്പോഴും തലവേദനയായിത്തീരാറുണ്ട്. എപ്പോഴും ഓടി നടക്കുന്ന, കൈയില്‍ കിട്ടുന്ന സാധനങ്ങള്‍ വലിച്ചെറിയുന്ന, തീരെ അടങ്ങിയിരിക്കാത്ത ഇത്തരം കുട്ടികള്‍ സ്‌കൂളിലും പ്രശ്‌നങ്ങളുണ്ടാക്കാറുണ്ട്. ഈ രോഗാവസ്ഥയാണ് 'ഹൈപ്പര്‍ കൈനറ്റിക് ഡിസോര്‍ഡര്‍' അഥവാ 'അറ്റന്‍ഷന്‍ ഡെഫിസിറ്റ് ഹൈപ്പര്‍ ആക്ടിവിറ്റി ഡിസോര്‍ഡര്‍' (A.D.H.D)എന്ന പേരില്‍ അറിയപ്പെടുന്നത്.

ആറ് വയസ്സിനുമുമ്പുതെന്ന ഈ കുട്ടികളില്‍ രോഗലക്ഷണങ്ങള്‍ കണ്ടുതുടങ്ങും. നടന്നുതുടങ്ങുന്ന കാലം മുതല്‍ തന്നെ വേഗത്തില്‍ സഞ്ചരിക്കാനുള്ള പ്രവണതയായിരിക്കും. പലപ്പോഴും കുട്ടികളില്‍ സഹജമായി കാണുന്ന വികൃതിയായി കരുതി ഇതിനെ അവഗണിക്കാനാണ് മാതാപിതാക്കള്‍ ശ്രമിക്കുന്നത്. എന്നാല്‍ ക്രമേണ കുട്ടി വീട്ടുസാധനങ്ങളും മറ്റും വലിച്ചുവാരി എറിഞ്ഞുതുടങ്ങുന്നതോടെ സ്ഥിതിമാറുന്നു. അടികൊടുത്തും ഉഗ്രമായി ശാസിച്ചും ഇതിനെ നിയന്ത്രിക്കാന്‍ ശ്രമിച്ചാലും പ്രയോജനമില്ലാതെ വരുന്നതോടെ പ്രശ്‌നം ഗൗരവമുള്ളതാകുന്നു.

ഈ കുട്ടികള്‍ സ്‌കൂളില്‍ പോയിത്തുടങ്ങുന്നതോടെ അവിടെയും പ്രശ്‌നങ്ങളാകും. ക്ലാസില്‍തീരെ അടങ്ങിയിരിക്കാത്ത കുട്ടിയെ ഒരു 'പ്രശ്‌ന'ക്കാരനായി അധ്യാപകര്‍ ചിത്രീകരിക്കുന്നതോടെ വിഷയം പിന്നെയുംസങ്കീര്‍ണമാകുന്നു.

ലക്ഷണങ്ങള്‍
അല്പംപോലും ഏകാഗ്രതയില്ലാത്ത തരത്തിലുള്ള ശ്രദ്ധക്കുറവ്, തുടര്‍ച്ചയായതും അലക്ഷ്യസ്വഭാവമുള്ളതുമായ ചലനങ്ങള്‍, പൊടുന്നനെ സംസാരിക്കാനും എടുത്തുചാടി കാര്യങ്ങള്‍ ചെയ്യാനുമുള്ള അക്ഷമനിറഞ്ഞ പ്രവണത എന്നിവയാണ് ഈ രോഗത്തിന്റെ മുഖ്യലക്ഷണങ്ങള്‍. ഇലക്ട്രിക്‌സ്വിച്ചുകളിലും ഉപകരണങ്ങളിലും നടത്തുന്ന പരീക്ഷണങ്ങള്‍, ഉയരത്തില്‍ നിന്ന് താഴേക്ക് ചാടല്‍, അതിവേഗത്തില്‍ മരംകയറല്‍ തുടങ്ങിയ ഇവരുടെ ചില പ്രവൃത്തികള്‍ ചിലപ്പോഴെങ്കിലും അപകടങ്ങളില്‍ കലാശിക്കുകയും ജീവന്‍തന്നെ നഷ്ടപ്പെടാന്‍ ഇടയാക്കുകയും ചെയേ്തക്കാം. മറ്റു കുട്ടികളോടൊപ്പം കളിക്കുമ്പോള്‍ തോല്‍വി അംഗീകരിക്കാന്‍ മടി, പൊടുന്നനെ ക്ഷോഭിക്കുകയും മറ്റുള്ളവരെ ആക്രമിക്കുകയും ചെയ്യുന്നസ്ഥിതി എന്നിവയും കാണാറുണ്ട്. വീട്ടിലാകട്ടെ, ആവശ്യപ്പെടുന്നതെന്തും ഉടനടി സാധിച്ചുകൊടുക്കാത്ത പക്ഷം അക്രമം കാണിക്കാനുള്ള പ്രവണതയുണ്ടാകും. ക്യൂ നില്‍ക്കുക, ക്ഷമയോടെ ഒരു കാര്യത്തിനായി കാത്തിരിക്കുക തുടങ്ങിയവ ഇത്തരക്കാര്‍ക്ക് ഏറെ പ്രയാസമാണ്.

ചില കുട്ടികളില്‍ മേല്പറഞ്ഞ ലക്ഷണങ്ങളോടൊപ്പം നിരന്തരമായ കളവ് പറച്ചില്‍, മോഷണം, ക്ലാസ്സില്‍ പോകാതിരിക്കുക, മൃഗങ്ങളെയും മറ്റും അകാരണമായി ഉപദ്രവിക്കുക, വീട് വിട്ട് ഓടിപ്പോകുക തുടങ്ങിയ ലക്ഷണങ്ങളും കണ്ടേക്കാം. ഈ അവസ്ഥയെ 'ഹൈപ്പര്‍ കൈനറ്റിക് കോണ്‍ഡക്ട് ഡിസോര്‍ഡര്‍' (Hiperkinetic Conduct Disorder) എന്ന പേരിലാണ് വിശേഷിപ്പിക്കാറുള്ളത്.

രോഗ കാരണം
ശ്രദ്ധ, ഏകാഗ്രത, ആത്മനിയന്ത്രണം എന്നീ ഗുണങ്ങളെ നിയന്ത്രിക്കുന്നത് മസ്തിഷ്‌കത്തിന്റെ മധ്യഭാഗത്തുള്ള മസ്തിഷ്‌കകാണ്ഡത്തിന്റെയും പാര്‍ശ്വഭാഗത്തുള്ള ടെമ്പറല്‍ ഖണ്ഡം, (Temperal Lobe) മുന്‍ഭാഗത്തുള്ള ഫ്രോണ്ടല്‍ ഖണ്ഡം (Frontal Lobe) എന്നിവയുടെ ഏകോപനത്തോടെയുള്ള പ്രവര്‍ത്തനമാണ്. ഈ പ്രവര്‍ത്തനങ്ങളിലെ മാന്ദ്യവും കാലതാമസവുമാണ് മേല്പറഞ്ഞ ഹൈപ്പര്‍ കൈനറ്റിക് കുട്ടികളുടെ പ്രശ്‌നം. ഗര്‍ഭകാലത്ത് അമ്മമാര്‍ക്കുണ്ടാകുന്ന രോഗങ്ങള്‍, മാതാപിതാക്കള്‍ തമ്മിലുള്ള പൊരുത്തക്കേട്, അച്ഛന്റെ മദ്യപാനശീലം, ചില ഹോര്‍മോണുകളുടെ തകരാറുകള്‍ എന്നിങ്ങനെ ജീവശാസ്ത്രപരവും സാമൂഹികവുമായ പല കാരണങ്ങള്‍ ഇതിന് പിന്നിലുണ്ട്. പക്ഷേ, മേല്പറഞ്ഞ കാരണങ്ങളൊന്നും ഇല്ലാത്ത കുട്ടികളിലും ഈ രോഗം കണ്ടിട്ടുണ്ട്. മസ്തിഷ്‌കത്തിന്റെ സവിശേഷതരത്തിലുള്ള വളര്‍ച്ചയിലെ മാന്ദ്യവും പ്രവര്‍ത്തനതകരാറും തന്നെയാണ് ഈ രോഗത്തിന്റെ അടിസ്ഥാനകാരണം.

ചികിത്സ
വെറും ഉപദേശ ചികിത്സകൊണ്ടു മാത്രം (ADHD)നിയന്ത്രിക്കാം എന്ന് കരുതിയിരുന്ന കാലം കഴിഞ്ഞു. മസ്തിഷ്‌കത്തിലെ താളപ്പിഴകള്‍ അടിസ്ഥാന കാരണങ്ങളായതുകൊണ്ടുതന്നെ അവയെ നിയന്ത്രിക്കാനുള്ള ഔഷധങ്ങള്‍ ഉപയോഗിക്കേണ്ടതുണ്ട്. മീതൈല്‍ ഫെനിഡേറ്റ് പോലെയുള്ള ഉത്തേജക ഔഷധങ്ങള്‍ (Stimulants), അറ്റോമോക്‌സെറ്റിന്‍, ക്ലോണിഡിന്‍, റിസ്‌പെരിഡോണ്‍ തുടങ്ങി വിവിധതരം ഔഷധങ്ങള്‍ ലഭ്യമാണ്. കുട്ടിയുടെ പ്രായവും ശാരീരിക ആരോഗ്യവും രോഗലക്ഷണങ്ങളുടെ സവിശേഷതയും മനസ്സിലാക്കിയ ശേഷമാണ് ഏതു ഔഷധം വേണമെന്ന് നിര്‍ണയിക്കുന്നത്. ഇത്തരം ഔഷധങ്ങള്‍ കഴിച്ചാല്‍ തലച്ചോറിന് തകരാര്‍ പറ്റുമെന്ന അബദ്ധധാരണ ചിലയാളുകള്‍ക്കുണ്ട്. എന്നാല്‍ ശാസ്ത്രീയ ഗവേഷണങ്ങള്‍ ഈ ഔഷധങ്ങളുടെ ഫലവും സുരക്ഷയും സംശയാതീതമായി തെളിയിച്ചിട്ടുണ്ട്.

ഔഷധങ്ങളോടൊപ്പം പെരുമാറ്റം വ്യത്യാസപ്പെടുത്താന്‍ സഹായിക്കുന്ന ബിഹേവിയര്‍ തെറാപ്പി, സൈക്കോ തെറാപ്പി, മാതാപിതാക്കള്‍ക്ക് നല്‍കിവരുന്ന പേരന്റ് മാനേജ്‌മെന്റ് ട്രെയിനിങ് (PMT) തുടങ്ങിയ രീതികള്‍ക്കും അതിന്‍േറതായ പങ്കുണ്ട്. കുട്ടികളെ നിരന്തരം അടിക്കുന്നതിനുപകരം 'ടൈം ഔട്ട്' പോലെയുള്ള ചില രീതികള്‍ ഫലപ്രദമാണ്. പഠനത്തിലെ ചിട്ടകളും സവിശേഷ പരിശീലനങ്ങളും ആവശ്യമാണ്.
രോഗലക്ഷണങ്ങള്‍ കണ്ട് അധികം വൈകാതെ തന്നെ ചികിത്സ ആരംഭിച്ചാല്‍ ADHD ബാധിച്ച കുട്ടികളുടെ പെരുമാറ്റത്തിലും പഠനത്തിലും നല്ല പുരോഗതി ഉണ്ടാകാറുണ്ട്.

ഡോ. അരുണ്‍ ബി. നായര്‍
എം.ബി.ബി.എസ്., എം.ഡി.
സൈക്യാട്രിസ്റ്റ്, അസിസ്റ്റന്റ് സര്‍ജന്‍
arunb.nair@yahoo.com

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.