ഹുസൈന്‍ ഹഖാനി പ്രസിഡന്റ് സര്‍ദാരിയുമായി കൂടിക്കാഴ്ച നടത്തി

ഇസ്‌ലാമാബാദ്: അമേരിക്കയിലെ പാക് അംബാസഡര്‍ ഹുസൈന്‍ ഹഖാനി പ്രസിഡന്‍റ് ആസിഫ് അലി സര്‍ദാരിയുമായി അനൗദ്യോഗിക കൂടിക്കാഴ്ച നടത്തി. യു.എസ് സംയുക്തസേനാ മേധാവി മൈക്ക് മുള്ളന് നല്‍കിയെന്നു പറയപ്പെടുന്ന രഹസ്യ രേഖയെച്ചൊല്ലി രാഷ്ട്രീയ വിവാദം പടരുന്നതിനിടെയാണ് ഹഖാനി സര്‍ദാരിയയെ കണ്ടത്. വിഷയത്തില്‍ പ്രധാനമന്ത്രി യൂസഫ് റാസ ഗിലാനി, ഹഖാനിയോട് വിശദീകരണം ആവശ്യപ്പെട്ടിരുന്നു. ഇതിന് മറുപടിയായി ഹഖാനി തന്റെ ഭാഗം വിശദീകരിക്കും.

അല്‍ഖ്വെയ്ദ മേധാവിയായിരുന്ന ഉസാമ ബിന്‍ലാദന്‍ കൊല്ലപ്പെട്ട ആബട്ടാബാദ് സംഭവത്തിനു ശേഷം രാജ്യത്ത് പട്ടാള അട്ടിമറി ഉണ്ടായേക്കുമെന്ന് ഭയന്ന സര്‍ദാരി അമേരിക്കയുടെ സഹായം തേടി രഹസ്യ രേഖ ഒരുക്കിയെന്ന് 'ഫിനാന്‍ഷ്യല്‍ ടൈംസ്' പത്രമാണ് റിപ്പോര്‍ട്ട് ചെയ്തത്.

കക്ഷിയായ പി.പി.പി.യും ഹഖാനിക്ക് വിശദീകരണത്തിന് അവസരം നല്‍കണമെന്ന് കഴിഞ്ഞ ദിവസം പറഞ്ഞിരുന്നു. ഹഖാനി നേരത്തെ രാജി സന്നദ്ധത പ്രകടിപ്പിച്ചെങ്കിലും സര്‍ദാരി തള്ളുകയായിരുന്നു. പാകിസ്താനിലേക്ക് തിരിക്കും മുമ്പ് പാക് അഫ്ഗാന്‍ മേഖലകളുടെ ചുമതലയുള്ള യു.എസിന്റെ പ്രത്യേക പ്രതിനിധിയുമായി ഹഖാനി ചര്‍ച്ച നടത്തി. വിവാദ രേഖ സംബന്ധിച്ച് പ്രതികരിക്കാന്‍ തുടക്കത്തില്‍ വിമുഖത കാട്ടിയ മൈക്ക് മുള്ളന്‍ പിന്നീട് ഇക്കാര്യം സമ്മതിച്ചിട്ടുണ്ട്. രേഖയിലെ നിര്‍ദേശങ്ങള്‍ ഗൗരവം അര്‍ഹിക്കുന്നതാണെന്ന് തോന്നിയില്ലെന്നും അതു കൊണ്ട് തന്നെ ഈ വിഷയം കാര്യമാക്കിയിട്ടില്ലെന്നുമാണ് അദ്ദേഹം പറഞ്ഞത്.

യു.എസ്. പ്രതിരോധ സെക്രട്ടറി ലിയോണ്‍ പനേറ്റയ്ക്കും മറ്റും രഹസ്യ രേഖയെ കുറിച്ച് അറിവുണ്ടായിരുന്നെന്ന് പെന്‍റഗണ്‍ പ്രസ് സെക്രട്ടറി ജോര്‍ജ് ലിറ്റില്‍ കഴിഞ്ഞ ദിവസം പറഞ്ഞിരുന്നു. അതേ സമയം രഹസ്യ രേഖയുമായി ബന്ധപ്പെട്ട വിവാദം പാകിസ്താന്റെ ആഭ്യന്തര വിഷയമാണെന്ന നിലപാടാണ് യു.എസ്. വിദേശകാര്യ വകുപ്പിനുള്ളത്. ഹഖാനി ഇപ്പോഴും യു.എസിലെ പാക് അംബാസഡര്‍ ആണെന്നും അദ്ദേഹവുമായി നിരന്തരം ബന്ധം പുലര്‍ത്തുന്നുണ്ടെന്നുമാണ് രഹസ്യരേഖാ വിവാദത്തെക്കുറിച്ച് യു.എസ്. വിദേശകാര്യ സെക്രട്ടറി മാര്‍ക്ക് ടോണര്‍ പറഞ്ഞത്. എന്നാല്‍ രഹസ്യ രേഖയുമായി സര്‍ദാരിക്കു ബന്ധമുണ്ടെന്നു കരുതുന്നില്ലെന്നാണ് പാക് പ്രധാനമന്ത്രി യൂസഫ് റാസ ഗീലാനി പറഞ്ഞത്.

മുംബൈ ഭീകരാക്രമണത്തില്‍ പങ്കുള്ള പാകിസ്താന്‍കാരെ ഇന്ത്യയ്ക്ക് കൈമാറും, പാകിസ്താനിലെ ഇപ്പോഴത്തെ സൈനികഘടന പൊളിച്ച് പുതിയ സുരക്ഷാ സംഘം രൂപവത്കരിക്കും, ഭീകര സംഘങ്ങളുമായി ബന്ധമുള്ള ഐ.എസ്.ഐയുടെ എസ് വിഭാഗത്തെ പൂര്‍ണമായി മാറ്റും, ഇക്കാര്യങ്ങള്‍ നടപ്പാക്കുമ്പോള്‍ യു.എസിനോട് വിധേയപ്പെട്ടിരിക്കും, സഹായം തേടും തുടങ്ങിയ നിര്‍ദേശങ്ങള്‍ രഹസ്യ രേഖയിലുണ്ടെന്നാണ് റിപ്പോര്‍ട്ട്.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.