കാബൂളിലെ ഹോട്ടലില്‍ തീവ്രവാദി ആക്രമണം: പത്തുപേര്‍ മരിച്ചു

കാബൂള്‍: അഫ്ഗാനിസ്താന്‍ തലസ്ഥാനമായ കാബൂളില്‍ താലിബാന്‍ തീവ്രവാദികള്‍ ഹോട്ടലിനുനേരെ നടത്തിയ ആക്രമണത്തില്‍ പത്തുപേര്‍ മരിച്ചു. ചൊവ്വാഴ്ച രാത്രി പത്തോടെയാണ് സര്‍ക്കാര്‍ ഉടമസ്ഥതയിലുള്ള ഇന്റര്‍കോണ്ടിനന്റല്‍ ഹോട്ടലില്‍ തീവ്രവാദികള്‍ ആക്രമണം നടത്തിയത്. തുടര്‍ന്ന് അഫ്ഗാന്‍ കമാന്‍ഡോകളും നാറ്റോ ഹെലിക്കോപ്റ്ററുകളും നടത്തിയ അഞ്ചു മണിക്കൂര്‍ നീണ്ട സൈനിക നടപടിയില്‍ ആക്രമണം നടത്തിയ തീവ്രവാദികള്‍ കൊല്ലപ്പെട്ടു.

അഫ്ഗാന്‍ സുരക്ഷാ സമ്മേളനത്തില്‍ പങ്കെടുക്കാനെത്തിയ സര്‍ക്കാര്‍ ഉദ്യോഗസ്ഥരും നിരവധി വിദേശികളും ഒരു വിവാഹ പാര്‍ട്ടിയില്‍ പങ്കെടുക്കാന്‍ എത്തിയവരും ആക്രമണം നടക്കുമ്പോള്‍ ഹോട്ടലില്‍ ഉണ്ടായിരുന്നു. 1960 ല്‍ നിര്‍മ്മിച്ച ഹോട്ടലിന്റെ ഒരുഭാഗം ആക്രമണത്തെ തുടര്‍ന്ന് കത്തിനശിച്ചു. മരിച്ച പത്തുപേരും ഹോട്ടല്‍ ജീവനക്കാരാണെന്ന് പോലീസ് പറഞ്ഞു. പോലീസുകാര്‍ അടക്കം നിരവധിപേര്‍ക്ക് പരിക്കേറ്റു. പരിക്കേറ്റവരില്‍ വിദേശികള്‍ ഉള്‍പ്പെട്ടിട്ടുണ്ടോയെന്ന് വ്യക്തമായിട്ടില്ല.

സംഭവത്തിന്റെ ഉത്തരവാദിത്വം താലിബാന്‍ ഏറ്റെടുത്തിട്ടുണ്ട്. ആക്രമണം നടത്തിയ തീവ്രവാദികളെ വധിച്ചതായി ആഭ്യന്തരമന്ത്രി ബിസ്മില്ലാ മുഹമ്മദി ബുധനാഴ്ച രാവിലെ മാധ്യമ പ്രവര്‍ത്തകരോട് പറഞ്ഞു. എന്നാല്‍ ആഭ്യന്തര മന്ത്രിയുടെ പ്രസ്താവനയ്ക്ക് ശേഷവും ഹോട്ടലില്‍നിന്ന് വെടിയൊച്ചകളും സ്‌ഫോടന ശബ്ദവും കേട്ടതായി വാര്‍ത്താ ഏജന്‍സി റിപ്പോര്‍ട്ടു ചെയ്തു.

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.