പാകിസ്താനില്‍ ആരാധനാലയത്തില്‍ സ്‌ഫോടനം :മരണം 42 ആയി

ഇസ്‌ലാമാബാദ്: പാകിസ്താനിലെ പഞ്ചാബ് പ്രവിശ്യയില്‍ സൂഫി ആരാധനാലയത്തിലുണ്ടായ സ്‌ഫോടനപരമ്പരയില്‍ മരിച്ചവരുടെ എണ്ണം 42 ആയി. നൂറിലേറെപ്പേര്‍ക്ക് പരിക്കേറ്റിട്ടുണ്ട്.

ചാവേര്‍ സ്‌ഫോടനങ്ങളാണ് ഇവയെന്ന് അധികൃതര്‍ സ്ഥിരീകരിച്ചു. ദേര ഖാസി ഖാനിനടുത്ത സാഖി സര്‍വാര്‍ ദര്‍ബാറിന്റെ പ്രവേശനകവാടത്തിലാണ് ആദ്യസ്‌ഫോടനമുണ്ടായത്. തൊട്ടുപിന്നാലെ പള്ളിക്കകത്ത് രണ്ടു സ്‌ഫോടനങ്ങളുമുണ്ടായി. ഞായറാഴ്ച വൈകിട്ട് പ്രാര്‍ഥനയ്ക്കായി നൂറുകണക്കിന് വിശ്വാസികള്‍ തടിച്ചു കൂടിയ സമയത്താണ് സംഭവം. പരിക്കേറ്റ 20 പേരുടെ നില ഗുരുതരമാണെന്ന് അധികൃതര്‍ അറിയിച്ചു.

13-ാം നൂറ്റാണ്ടില്‍ ജീവിച്ചിരുന്ന സൂഫിസന്ന്യാസി സാഖി സര്‍വാറിന്റെ ശവകുടീരമുള്‍പ്പെടുന്ന സ്ഥലത്താണ് സ്‌ഫോടനമുണ്ടായത്. ദേഹത്ത് ബോംബ് വെച്ചു കെട്ടിയെത്തിയ ചാവേര്‍ ഭീകരരാണ് സ്‌ഫോടനം നടത്തിയതെന്ന് സുരക്ഷാ അധികൃതര്‍ അറിയിച്ചു. പോലീസ് ദേഹപരിശോധനയ്ക്കായി തടഞ്ഞപ്പോള്‍ ബോംബ് പൊട്ടിക്കുകയായിരുന്നു.

സ്‌ഫോടനത്തിന്റെ ഉത്തരവാദിത്വം ആരും ഏറ്റെടുത്തിട്ടില്ല. എന്നാല്‍ സൂഫി ആരാധനാലയങ്ങള്‍ അനിസ്‌ലാമികമാണെന്നാരോപിച്ച് താലിബാന്‍ ഭീകരര്‍ ആക്രമണം നടത്താറുണ്ട്. ഞായറാഴ്ചത്തെ ആക്രമണത്തിന് പിന്നിലും അവരാകാനാണ് സാധ്യതയെന്ന് അധികൃതര്‍ പറഞ്ഞു.

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.