ഡേവിസിന്റെ മോചനം: പാക്ക് കോടതി തീരുമാനം മാര്‍ച്ച് 14ലേക്കു മാറ്റി

ലാഹോര്‍: ഇരട്ടക്കൊലക്കുറ്റത്തിന് പാക്കിസ്ഥാനില്‍ തടവിലായ യുഎസ് നയതന്ത്ര ഉദ്യോഗസ്ഥന്‍ റെയ്മണ്ട് ഡേവിസിന്റെ മോചനം സംബന്ധിച്ചു തീരുമാനമെടുക്കുന്നത് ഹൈക്കോടതി മാര്‍ച്ച് 14ലേക്കു നീട്ടി. ഡേവിസിന്റെ നയതന്ത്ര സ്ഥാനം സംബന്ധിച്ചു മറുപടി നല്‍കുന്നതിനു വിദേശകാര്യ മന്ത്രാലയം കൂടുതല്‍ സമയം ആവശ്യപ്പെട്ടതിനെത്തുടര്‍ന്നാണ് കേസ് മാറ്റിയത്. ക്രൂര കൃത്യങ്ങള്‍ നടത്തിയവര്‍ക്കു വിയന്ന ഉടമ്പടിപ്രകാരം നയതന്ത്ര പരിരക്ഷ ലഭിക്കില്ലെന്നു സര്‍ക്കാരിനു വേണ്ടി ഹാജരായ അഭിഭാഷകന്‍ വാദിച്ചു.

ഡേവിസിന്റെ മോചനം ആവശ്യപ്പെട്ട് യുഎസ് സമ്മര്‍ദം ശക്തമാക്കുമ്പോഴാണ് കേസ് നീട്ടിയത്. നയതന്ത്രജ്ഞന് അവകാശപ്പെട്ട നിയമപരിരക്ഷ നല്‍കി ഡേവിസിനെ മോചിപ്പിക്കണമെന്ന് കഴിഞ്ഞ ദിവസം യുഎസ് പ്രസിഡന്റ് ബറാക് ഒബാമ തന്നെ പാക്കിസ്ഥാനോട് ആവശ്യപ്പെട്ടിരുന്നു.

ജനുവരി 27നാണ് ലഹോറില്‍ രണ്ടുപേരെ വെടിവച്ചു കൊന്നതിന് റെയ്മണ്ട് ഡേവിസ് അറസ്റ്റിലായത്. കവര്‍ച്ചാശ്രമം നടത്തിയ സായുധരായ രണ്ടുപേരില്‍ നിന്നും രക്ഷപ്പെടാന്‍ സ്വയരക്ഷയ്ക്കു വെടിവച്ചതാണെന്നാണ് ഇദ്ദേഹം പറയുന്നത്.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.