എന്‍ഡോസള്‍ഫാന്‍ രാജ്യവ്യാപകമായി നിരോധിക്കേണ്ടെന്ന് ഐ.സി.എം.ആര്‍ റിപ്പോര്‍ട്ട്

ന്യൂഡല്‍ഹി: എന്‍ഡോസള്‍ഫാന്‍ രാജ്യവ്യാപകമായി നിരോധിക്കേണ്ടെന്ന് ഇന്ത്യന്‍ കൗണ്‍സില്‍ ഫോര്‍ മെഡിക്കല്‍ റിസര്‍ച്ച് റിപ്പോര്‍ട്ട്. എന്‍ഡോസള്‍ഫാന് പകരമായുള്ള കീടനാശിനികള്‍ ചെലവേറിയതാണെന്നും കേരളത്തിലും കര്‍ണാടകയിലും മാത്രം എന്‍ഡോസള്‍ഫാന്‍ നിരോധിച്ചാല്‍ മതിയെന്നും ഐ.സി.എം.ആര്‍ റിപ്പോര്‍ട്ടിലുണ്ട്.

കാസര്‍കോട് മേഖലയില്‍ എന്‍ഡോസള്‍ഫാന്‍ ബാധിതരായ 489 പേരിലാണ് ഐ.സി.എം.ആര്‍ പഠനം നടത്തിയത്. ഇവരില്‍ 15 പേരില്‍ മാത്രമാണ് (0.49 ശതമാനം) അനുവദനീയമായതിലും (maximum residue limti) കൂടുതല്‍ എന്‍ഡോസള്‍ഫാന്‍ കണ്ടെത്തിയത്.

ആകാശമാര്‍ഗം എന്‍ഡോസള്‍ഫാന്‍ തളിച്ച പ്രദേശത്താണ് ആരോഗ്യപ്രശ്‌നങ്ങള്‍ കണ്ടത്. ഇവിടെ കരള്‍, വൃക്ക രോഗങ്ങള്‍ വ്യാപകമാണെന്നും ഐ.സി.എം.ആര്‍ റിപ്പോര്‍ട്ടിലുണ്ട്. മറ്റ് സംസ്ഥാനങ്ങളില്‍ ആരോഗ്യപ്രശ്‌നങ്ങള്‍ റിപ്പോര്‍ട്ട് ചെയ്യാത്തതിനാല്‍ നിരോധനം ആവശ്യമില്ലെന്നും ഇന്ത്യന്‍ കൗണ്‍സില്‍ ഫോര്‍ മെഡിക്കല്‍ റിസര്‍ച്ച് ശുപാര്‍ശ ചെയ്യുന്നു.

എന്‍ഡോസള്‍ഫാന്‍ ഇരകളുടെ പുനരധിവാസത്തിന് നൂതന ശാസ്ത്രീയ രീതികള്‍ കൈക്കൊള്ളണമെന്ന് ഐ.സി.എം.ആര്‍ ഡയറക്ടര്‍ ജനറല്‍ ഡോ. വിശ്വമോഹന്‍ കട്ടോജ് കഴിഞ്ഞ ദിവസം വെളിപ്പെടുത്തിയിരുന്നു.

ഐ.സി.എം.ആറിന്റെ നിര്‍ദേശപ്രകാരം 2003 ല്‍ മണിപ്പാല്‍ കസ്തൂര്‍ബാ മെഡിക്കല്‍ കോളേജിലെ വിദഗ്ധര്‍ പഠനം നടത്തിയിരുന്നു. എന്‍ഡോസള്‍ഫാന്‍ വന്ധ്യതക്ക് കാരണമാകുന്നുവെന്ന് ഇവര്‍ കണ്ടെത്തി 2006 ല്‍ പഠനറിപ്പോര്‍ട്ട് സമര്‍പ്പിച്ചെങ്കിലും ഇതേ വരെ ഐ.സി.എം.ആര്‍ ഈ റിപ്പോര്‍ട്ട് പ്രസിദ്ധീകരിച്ചിട്ടില്ല.

Related News » എന്‍ഡോസള്‍ഫാന്‍ : ഐ സി എം ആര്‍ സംഘം കാസര്‍കോട്ടെത്തി

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.