എന്‍ഡോസള്‍ഫാന്‍ : സോളിഡാരിറ്റി പാര്‍ലമെന്റ് മാര്‍ച്ചും ധര്‍ണ്ണയും നടത്തും

‌ന്യൂദല്‍ഹി: `സ്റ്റോക്‌ഹോം കണ്‍വെന്‍ഷനില്‍ എന്‍ഡോസള്‍ഫാന്‍ നിരോധനത്തിന് അനുകൂലമായി ഇന്ത്യ വോട്ടു ചെയ്യണമെന്ന ആവശ്യമുന്നയിച്ച് ഏപ്രില്‍ 25 തിങ്കളാഴ്ച സോളിഡാരിറ്റിയുടെ ആഭിമുഖ്യത്തില്‍ പാര്‍ലമെന്റ് മാര്‍ച്ചും ധര്‍ണ്ണയും നടത്തും. സോളിഡാരിറ്റി നടത്തി വരുന്ന എന്‍ഡോസള്‍ഫാന്‍ വിരുദ്ധ സമരത്തിന്റെ തുടര്‍ച്ചയായാണ് പാര്‍ലമെന്റ് മാര്‍ച്ച് സംഘടിപ്പിക്കുന്നത്. ദേശീയ തലത്തില്‍ അറിയപ്പെടുന്ന നേതാക്കളും മനുഷ്യാവകാശ പരിസ്ഥിതി പ്രവര്‍ത്തകരും വൈകിട്ട് 3.00 ന് നടക്കുന്ന മാര്‍ച്ചിനെ അഭിസംബോധന ചെയ്യും. എന്‍ഡോസള്‍ഫാന്‍ നിരോധിക്കണമെന്നാവശ്യപ്പെടുന്ന ബാനറില്‍ ഒപ്പു ശേഖരണവും നടത്തും.

കാസര്‍കോട് ജില്ലയില്‍ മാത്രം 200 ലധികം പേരുടെ മരണത്തിനും ആയിരക്കണക്കിനാളുകളുടെ തീരാരോഗബാധക്കും കാരണമായ എന്‍ഡോസള്‍ഫാന് താല്‍കാലികമായി കേരളത്തില്‍ നിരോധനം ഏര്‍പ്പെടുത്തിയിട്ടുണ്ട്. ജനകീയ പ്രക്ഷോഭത്തെത്തുടര്‍ന്ന് അയല്‍ സംസ്ഥാനമായ കര്‍ണ്ണാടകയിലും എന്‍ഡോസള്‍ഫാന്‍ ഈയിടെ നിരോധിക്കുകയുണ്ടായി. ഈ കീടനാശിനി ഉപയോഗിക്കുന്ന പഞ്ചാബില്‍ നിന്നും രോഗബാധ റിപ്പോര്‍ട്ടു ചെയ്യപ്പെട്ടിട്ടുണ്ട്. ഈ സാഹചര്യങ്ങള്‍ കണക്കിലെടുത്ത് ദേശീയ തലത്തില്‍ എന്‍ഡോസള്‍ഫാന്‍ നിരോധിക്കാന്‍ കേന്ദ്ര സര്‍ക്കാര്‍ തയ്യാറാകണം.
ഐക്യരാഷ്ട്രസഭയുടെ പരിസ്ഥിതി സമിതിക്കു കീഴില്‍ രൂപം കൊണ്ട സ്‌റ്റോക്‌ഹോം കണ്‍വെന്‍ഷന്റെ ഭാഗമായ പി.ഒ.പി. അവലോകന സമിതിയാണ് വിശദവും ശാസ്ത്രീയവുമായ പഠനങ്ങള്‍ക്ക് ശേഷം എന്‍ഡോസള്‍ഫാന്‍ നിരോധിക്കാനുള്ള തീരുമാനം ഈ മാസം 25 മുതല്‍ 29 വരെ ജനീവയില്‍ നടക്കുന്ന അംഗരാജ്യങ്ങളുടെ സമ്പൂര്‍ണ്ണ സമ്മേളനത്തിന്റെ അംഗീകാരത്തിന് ശുപാര്‍ശ ചെയ്തത്. എന്‍ഡോസള്‍ഫാന്‍ നിരോധിക്കാന്‍ ആഗോളതലത്തില്‍ ഉയരുന്ന ആവശ്യത്തോട് അനുകൂലമായി പ്രതികരിക്കുന്നതിനുപകരം കുത്തക കീടനാശിനി കമ്പനികള്‍ക്ക് വിധേയപ്പെട്ട സമീപനം സ്വീകരിച്ച കൃഷിമന്ത്രി ശരത്പവാറിന്റെ സമീപനം അങ്ങേയറ്റം അപലപനീയവും പ്രതിഷേധാര്‍ഹവുമാണ്.പ്രസ്തുത സമ്മേളനത്തില്‍ എന്‍ഡോസള്‍ഫാന്‍ നിരോധനത്തിന് അനുകൂലമായി ഇന്ത്യ നിലപാടെടുക്കണം.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.