എന്‍ഡോള്‍ഫാന്‍ ബാധിച്ച് ആശുപത്രിയില്‍ ചികിത്സയിലുള്ള കുട്ടി ദുരിതകയത്തില്‍

കാസര്‍കോട് : എന്‍ഡോള്‍ഫാന്‍ ബാധിച്ച് ചികിത്സയ്‌ക്കെത്തിയ കുട്ടിയുടെ നില ഗുരുതരം. എണ്‍മകജെ പഞ്ചായത്തിലെ ഒന്നാംവാര്‍ഡ് അഡ്യനടുക്ക ബാക്കിലപദവിലെ കൃഷ്ണനായ്ക്കിന്റെ മകന്‍ ശിവപ്രസാദ് (11) ആണ് അസുഖം മൂര്‍ച്ഛിച്ചതിനെ തുടര്‍ന്ന് കാസര്‍കോട് ജനറല്‍ ആശുപത്രിയിലേക്ക് മാറ്റിയത്. കഴിഞ്ഞ മാര്‍ച്ച് 21 ന് വിദഗ്ദ ചികിത്സയ്ക്കായി കോഴിക്കോട് മെഡിക്കല്‍ കോളേജില്‍ പ്രവേശിപ്പിച്ചിരുന്നു. 27 ദവസത്തെ ചികിത്സയ്ക്ക് ശേഷം ഇന്നലെ രാത്രിയോടെ കോഴിക്കോട് മെഡിക്കല്‍ കോളേജില്‍ നിന്നും വീണ്ടും കാസര്‍കോട് ജനറല്‍ ആശുപത്രിയില്‍ പ്രവേശിപ്പിക്കുയായിരുന്നു. ജന്മനാ സംസാരശേഷിയോ നടക്കാനോ സാധിക്കാത്ത ശിവപ്രസാദിന് ഭക്ഷണം കഴിക്കാന്‍ പരസഹായമില്ലാതെ സാധിക്കുന്നില്ല. ആശുപത്രിയില്‍ പ്രവേശിപ്പിച്ച സമയത്ത് ചെറിയതോതില്‍ അപസ്മാര ലക്ഷണമുണ്ടായിരുന്നെങ്കിലും ചികിത്സയ്ക്ക് ശേഷം അസുഖം കൂടുതല്‍ വഷളാവുകയായിരുന്നു. എല്ലുപൊട്ടിയതുകാരണം വലതുകാലിന് ബാന്‍ഡേജ് ചെയ്ത നിലയിലാണുള്ളത്. സര്‍ക്കാരില്‍ നിന്ന് ധനസഹായമായി മാസംതോറും 700 രൂപയും ചികിത്സാ സഹായമായി 5000 രൂപയും ലഭിച്ചതായി കൃഷ്ണ നായ്ക്ക് പറയുന്നു.

മകന്റെ ശുഷ്രൂഷ ചെയ്യേണ്ടത് കാരണം ജോലിക്ക് പോകാന്‍ സാധിക്കാത്തതിനാല്‍ സര്‍ക്കാരില്‍ നിന്നും ലഭിക്കുന്ന ധനസഹായം മാത്രമാണ് ഈ കുടുംബത്തിന്റെ ഏക ആശ്രയം. മൂന്നാം ക്ലാസില്‍ പഠിക്കുന്ന ശ്രീലക്ഷ്മി, ആറുവയസുകാരന്‍ ദേവരാജ്, ഭാര്യ അഥിതിയുമടങ്ങുന്നതാണ് ഇദ്ദേഹത്തിന്റെ കുടുംബം. നാലു കിലോമീറ്ററോളം നടന്നുവേണം സ്‌കൂളിലെത്താന്‍. അതുകൊണ്ട് കൃഷ്ണ നായ്ക്കിന്റെ ചെറിയ മകനെ സ്‌കൂളില്‍ അയക്കാന്‍ സാധിക്കാത്ത അവസ്ഥയാണ് ഇപ്പോഴുള്ളതെന്നും അദ്ദേഹം പറഞ്ഞു.

സര്‍ക്കാര്‍ ചിലവിലാണ് കുട്ടിയെ കാസര്‍കോട് ജനറല്‍ ആശുപത്രിയില്‍ എത്തിച്ചതെന്നും ശിവപ്രസാദിന്റെ അസുഖം ഭേദമാകുമെന്ന് ഡോക്ടര്‍മാര്‍ ഉറപ്പുനല്‍കുന്നില്ലെന്നും കൃഷ്ണനായ്ക്ക് പറഞ്ഞു.

എന്‍ഡോള്‍ഫാന്‍ ബാധിച്ച് ആശുപത്രിയില്‍ ചികിത്സയിലുള്ള കുട്ടി ദുരിതകയത്തില്‍ Photos: Kumar Kasaragod Posted on : 2011-04-12

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.