പ്ലാന്‍റേഷന്‍ കോര്‍പറേഷന്‍ എംഡിയെ മാറ്റി

തിരുവനന്തപുരം: പ്ലാന്‍റേഷന്‍ കോര്‍പറേഷന്‍ എംഡി എന്‍.കെ. മനോജിനെ തത് സ്ഥാനത്തു നിന്നു നീക്കി. എന്‍ഡോസള്‍ഫാന്‍ വിഷയത്തില്‍ സര്‍ക്കാര്‍ നിലപാടിനു വിരുദ്ധമായി ഹൈക്കോടതിയില്‍ സത്യവാങ്മൂലം നല്‍കിയതിനെത്തുടര്‍ന്നാണിത്. സത്യവാങ് മൂലത്തില്‍ തിരുത്തുവരുത്തുമെന്നു കൃഷിമന്ത്രി മുല്ലക്കര രത്നാകരന്‍ അറിയിച്ചു. സര്‍ക്കാര്‍ സത്യവാങ്മൂലത്തില്‍ നിന്നു കാര്യമായ വ്യത്യാസം ഉണ്ടാകരുതെന്നു കോര്‍പറേഷനോടു സര്‍ക്കാര്‍ നിര്‍ദേശിച്ചിരുന്നു. ഇതുലംഘിച്ചതായി തെളിഞ്ഞതിനെത്തുടര്‍ന്നാണു നടപടി.

കാസര്‍കോട്ടെ എന്‍ഡോസള്‍ഫാന്‍ ദുരിത ബാധിതര്‍ക്കു നഷ്ടപരിഹാരം നല്‍കാന്‍ ബാധ്യതയില്ലെന്നു കാണിച്ചു കോര്‍പറേഷന്‍ ഹൈക്കോടതിയില്‍ നല്‍കിയ സത്യവാങ് മൂലമാണു വിവാദമായത്. സംസ്ഥാനം നിരോധിച്ച എന്‍ഡോസള്‍ഫാന്‍ നിരോധിത കീടനാശിനിയല്ലെന്നും വിദഗ്ധ സമിതി നിര്‍ദേശപ്രകാരമായിരുന്നു മരുന്നു തളിച്ചതെന്നും സത്യവാങ്മൂലത്തില്‍ വ്യക്തമാക്കിയിരുന്നു. നഷ്ടപരിഹാര ട്രൈബ്യൂണല്‍ എന്ന ആവശ്യം പരിഗണിക്കരുതെന്നും ആവശ്യപ്പെട്ടിരുന്നു. സര്‍ക്കാര്‍ നിലപാടിനും മുന്‍പു സമര്‍പ്പിച്ച സത്യവാങ്മൂലത്തിനും വിരുദ്ധമാണു കോര്‍പറേഷന്‍റേത്.

സര്‍ക്കാര്‍ സത്യവാങ്മൂലവുമായി കോര്‍പറേഷന്‍റേതിനുള്ള വ്യത്യാസം പരിശോധിച്ചു തിരുത്തി സമര്‍പ്പിക്കാനും തീരുമാനിച്ചുവെന്നു മുല്ലക്കര അറിയിച്ചു. സത്യവാങ്മൂലം ഒന്നാകെ മാറ്റുന്നതിന്‍റെ നിയമസാധുതയും പരിശോധിക്കും. തന്നെ മാറ്റണമെന്നു കോര്‍പറേഷന്‍ എംഡി ആവശ്യപ്പെട്ടുവെന്നു മന്ത്രി നേരത്തെ വാര്‍ത്താ സമ്മേളനത്തില്‍ അറിയിച്ചിരുന്നു

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.