ഖാസി മരണം : സമസ്ത മതവിദ്യാഭ്യാസ ബോര്‍ഡ് മേല്‍പറമ്പില്‍ പ്രകടനം നടത്തി

മേല്‍പറമ്പ് : മതപണ്ഡിതനും ഖാസിയുമായിരുന്ന സി എം അബ്ദുല്ല മൗലവിയുടെ മരണം സംബന്ധിച്ച് സി ബി ഐ കോടതിയില്‍ സമര്‍പ്പിച്ച റിപ്പോര്‍ട്ടില്‍ പ്രതിഷേധിച്ച് സമസ്ത മതവിദ്യാഭ്യാസ ബോര്‍ഡ് കോട്ടിക്കുളം റേഞ്ചിന്റെ നേതൃത്വത്തില്‍ മേല്‍പറമ്പില്‍ പ്രകടനം നടത്തി. കല്ലട്ര മാഹിന്‍ ഹാജി, ഖത്തര്‍ ഇബ്രാഹിം ഹാജി, ഷാഫി കട്ടക്കാല്‍, മജീദ് ചെമ്പരിക്ക, താജുദ്ദിന്‍ ചെമ്പരിക്ക, സി ബി ഹനീഫ്, പി എ മുഹമ്മദ് കുഞ്ഞി, അഹമ്മദ് ഷാഫി ദേളി, ഹമീദ് കുണിയ, ഖാലിദ് ഫൈസി, ബി പി മുഹമ്മദ് മൗലവി, അബ്ദുല്‍ഖാദര്‍ തായ്യം, എന്നിവര്‍ പ്രകടനത്തിന് നേതൃത്വം നല്‍കി.

2010 ഫിബ്രവരി 15ന് പുലര്‍ച്ചെയാണ് മംഗലാപുരം ചെമ്പരിക്ക ഖാസി സി.എം.അബ്ദുല്ല മൗലവിയെ ചെമ്പരിക്ക തീരക്കടലില്‍ മരിച്ച നിലയില്‍ കണ്ടത്. ഖാസിയുടെ വടി, ചെരിപ്പ്, ടോര്‍ച്ച് എന്നിവ ചെമ്പരിക്ക തീരത്തെ കടുക്കക്കല്ലിന് മുകളില്‍നിന്ന് കിട്ടിയിരുന്നു. ഖാസിയുടെ വീടിന്റെ മുന്‍വാതില്‍ പറത്തുനിന്ന് താഴിട്ട് പൂട്ടിയ നിലയിലുമായിരുന്നു. ഒറ്റയ്ക്ക് നടക്കാന്‍ കഴയാതിരുന്ന ഖാസിയുടെ മൃതദേഹം കടലില്‍ കണ്ടെത്തിയതിന് പിന്നിലെ ദുരൂഹത നീക്കണമെന്നാവശ്യപ്പെട്ട് ബന്ധുക്കളും നാട്ടുകാരും രംഗത്തെത്തി. കടുത്ത പ്രതിഷേധത്തിന്റെയും സമരത്തിന്റെയും ഫലമായാണ് കേസ് ഒടുവില്‍ സി.ബി.ഐ.ക്ക് കൈമാറിയത്. ക്രൈംബ്രാഞ്ച് അന്വേഷണം പുരോഗമിക്കവെ 2010 സപ്തംബറിലാണ് സി.ബി.ഐ. കേസ് ഏറ്റെടുത്തത്. ബന്ധുക്കളും നാട്ടുകാരുമടക്കം നിരവധിപേരെ അവര്‍ ചോദ്യംചെയ്തു. അടുത്ത ബന്ധുക്കളില്‍ ചിലരെ നുണപരിശോധനയ്ക്കും വിധേയരാക്കിയിരുന്നു.

ഖാസി മരണം : സമസ്ത മതവിദ്യാഭ്യാസ ബോര്‍ഡ് മേല്‍പറമ്പില്‍ പ്രകടനം നടത്തി Photos : Farooq Kizhur Posted on : 2011-12-04

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.