പാലക്കുന്ന് ശ്രീ ഭഗവതി ക്ഷേത്രം ഭരണിമഹോത്സവം 19 മുതല്‍ 23 വരെ

കാസര്‍കോട് : ഭക്തജനസഹസ്രങ്ങളില്‍ അനുഗ്രഹം ചൊരിയുന്ന ജഗദംബികയായ പാലക്കുന്ന് ശ്രീ ഭഗവതി ക്ഷ്രേത്തിലെ ഭരണി മഹോത്സവം ഫെബ്രുവരി 19 മുതല്‍ 23 വരെ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ഫെബ്രുവരി 19 ഞായറാഴ്ച രാത്രി 9 മണിക്ക് ഭണ്ഡാരവീട്ടില്‍ നിന്നും ക്ഷേത്രത്തിലേക്ക് എഴുന്നള്ളത്ത് തുടര്‍ന്ന് ശുദ്ധികര്‍മ്മങ്ങള്‍, കലശാട്ട്. രാത്രി 12.30 ന് ഭരണിമഹോത്സവത്തിന് കൊടിയേറും. കരിപ്പോടി പ്രാദേശിക സമിതിയുടെയും, പ്രാദേശിയ യു എ ഇ കമ്മിറ്റിയുടെയും വക അതിഗംഭീര കരുമരുന്ന് പ്രയോഗവും ഉണ്ടാകും.

20 ന് ഭൂതബലി ഉത്സവം, ഭജന, സന്ധ്യാദീപം, കലശാട്ട്, ഭൂതബലിപ്പാട്ട്, പുരക്കളി, പുലര്‍ച്ചെ 4.30 ന് ഭൂതബലി ഉത്സവം, രാവിലെ 7 മണിക്ക് ഉത്സവബലി.

21 ന് താലപ്പൊലി ഉത്സവം. ഉച്ചയ്ക്ക് 12.30 മുതല്‍ അന്നദാനം. വൈകുന്നേരം ഭജന. തുടര്‍ന്ന് സന്ധ്യാദീപം, കലശാട്ട്, പൂരക്കളി, രാത്രി 9 മണിക്ക് സുപ്രസിദ്ധ സിനിമാ സംഗീത സംവിധായകന്‍ സംഗീത രത്‌നം ജയന്‍ (ജയവിജയന്‍) അവതരിപ്പിക്കുന്ന സംഗീത സദസ്സും ഭക്തിഗാനമേളയും. പുലര്‍ച്ചെ 4.30 ന് താലപ്പൊലി എഴുന്നള്ളത്ത്, രാവിലെ 7 മണിക്ക് ഉത്സവബലി.

22 ബുധനാഴ്ച പ്രസിദ്ധമായ ആയിരത്തിരി മഹോത്സവം.

രാത്രി 10 ന് ഉദുമ പടിഞ്ഞാര്‍ക്കര തിരുമുല്‍ക്കാഴ്ച : തുടര്‍ച്ചയായി മുപ്പത്തൊമ്പതാം തവണയും തിരുമുല്‍ക്കാഴ്ചയായി തിരുസന്നിധിയില്‍ എത്തുന്ന ഉദുമ പടിഞ്ഞാര്‍ക്കര തിരുമുല്‍ക്കാഴ്ച ഘോഷയാത്രയില്‍ ബാലികമാരുടെ താലപ്പൊലി, വര്‍ണ്ണാഭമായ മുത്തുക്കുടകള്‍, പുഷ്പാലംകൃതമായ മണ്ഡപം, കര്‍ണ്ണാടകത്തിലേയും, കേരളത്തിലേയും തെരഞ്ഞെടുത്ത കലാകാരന്‍മാരും കലാകാരികളും അണിനിരക്കുന്ന വിവിധ കലാപരിപാടികള്‍, വൈദ്യുത് പ്രഭാവലികള്‍, നിശ്ചല ദൃശ്യങ്ങള്‍ എന്നിവ അണിനിരക്കും.

രാത്രി 11 ന് അരവത്ത് - കളിങ്ങോം പ്രദേശ് തിരുമുല്‍ക്കാഴ്ച : ക്ഷേത്ര ഭണ്ഡാര വീട്ടിനു മുന്‍വശത്ത് ഷീറ്റ് പന്തല്‍ നിര്‍മ്മിച്ച് തിരുമുല്‍ക്കാഴ്ചാ സമര്‍പ്പണം നടത്തുന്ന അരവത്ത് - കളിങ്ങോം പ്രദേശ് തുരുമുല്‍ക്കാഴ്ചയില്‍ വിഷ്ണുകൃപാ വീരാഞ്ജനേയ വ്യായാമശാല (ഉപ്പള) ഒരുക്കുന്ന താലിം പ്രദര്‍ശനം, പാലക്കുന്ന് ആദിശക്തി പുലുക്കളി നാടന്‍ കലാക്ഷേത്രം അവതരിപ്പിക്കുന്ന പുലിക്കളി, രഞ്ജിനി കലാ-കായിക വേദി കളിങ്ങോത്തിന്റെ അമ്മംകൂടം നൃത്തം, പനയാല്‍ ചന്ദ്രശേഖരരാമരാറും സംഘവും നയിക്കുന്ന തായമ്പക, മംഗലാപുരം ബാലു ആര്‍ട്‌സിന്റെ ടാബ്ലോ, വൈദ്യുത പ്രഭാവലി, താലപ്പൊലിയേന്തിയ ബാലികമാര്‍, മുത്തുക്കുടകള്‍, ഭജന എന്നിവ മാറ്റുകൂട്ടുന്നു.

രാത്രി 12 ന് : പള്ളിക്കര - തണ്ണീര്‍പ്പുഴ തിരുമുല്‍ക്കാഴ്ച : തുടര്‍ച്ചയായി അമ്പത്തിനാലാം തവണയും തിരുമുല്‍ക്കാഴ്ചാ സമര്‍പ്പണം നടത്തുന്ന തിരുമുല്‍കാഴ്ചയെ വര്‍ണ്ണാഭമാക്കാന്‍ ചിലിപിലി ആര്‍ട്‌സ് ബി സി റോഡിന്റെ കുതിരയാട്ടം, അനാര്‍ക്കലി ഡാന്‍സ്, വിവിധ കലാരൂപങ്ങള്‍, പാലക്കാട് കെ സ്വാമിനാഥന്‍ ആന്റ് പാര്‍ട്ടിയുടെ കാവടിയാട്ടം, പാലക്കുന്ന്, ആദിശക്തി പുലിക്കളി, നാടന്‍കലാക്ഷേത്രം അവതരിപ്പിക്കുന്ന ഡ്രാഗണ്‍ ഡാന്‍സ്, ഉത്തരേന്ത്യന്‍ കലാരൂപമായ പോത്ത്കളി, ശ്രീശക്തി വാദ്യസംഘം ശക്തിനഗറിന്റെ ചെണ്ടമേളം, തെക്കേക്കുന്ന് യുവകൂട്ടായ്മയുടെ നാടന്‍ തുടിതാള ചടുലനൃത്ത സംഗമം. കരിങ്കാളിമൂപ്പന്‍, വൈദ്യുത പ്രഭാവലി എന്നിവ അണിനിരക്കും.

രാത്രി 1.00 ന് മംഗലാപുരം പ്രദേശ് തിരുമുല്‍ക്കാഴ്ച : അഞ്ചുപവന്‍ തൂക്കം വരുന്ന സ്വര്‍ണ്ണാഭരണം കാഴ്ചാ വസ്തുവായി സമര്‍പ്പിക്കുന്ന മംഗലാപുരം തിരുമുല്‍ക്കാഴ്ചയ്ക്ക് താലപ്പൊലിയേന്തിയ ബാലികമാര്‍, മുത്തുക്കുടകള്‍, ചെണ്ടമേളം, ഭജന, മംഗലാപുരത്തെ കലാകാരന്‍മാര്‍ അവതരിപ്പിക്കുന്ന പുലിവേഷങ്ങള്‍, കാസര്‍കോട് ബാബുവും സംഘത്തിന്റെയും താലിം പ്രദര്‍ശനം, മടിക്കേരി കലാകാരന്‍മാര്‍ അത്യാന്താധുനിക സാങ്കേതികവിദ്യ ഉപയോഗിച്ച് പുരാണേതിഹാസ സന്ദര്‍ഭങ്ങള്‍ പുനരാവിഷ്‌ക്കരിക്കുന്ന, നിശ്ചലദൃശ്യങ്ങള്‍, വൈദ്യുത പ്രഭാവലികള്‍, മറ്റു നിശ്ചല-ചലന കലാകായിക പ്രകടനങ്ങള്‍ തുടങ്ങിയവ മികവേകും.

.

ഈ വാര്‍ത്ത / വിവരങ്ങള്‍ നിങ്ങളുടെ സുഹൃത്തിന്‌ അയച്ചുകൊടുക്കുക.